Вильна. 1476 г., марта 14.
Вселенскому папе, великому солнцу, всемирному светильнику, церковному свету, всесвятому и всенасвятейшему, отцу отцем и всеначалнейшему пастырю пастырем, блаженному Сикту святыя вселенския соборныя церкви, рикарию наидостоинейшему, в первых священных чиноначалия светлосияющему пресвяще-нием, небеснаго разума озарения, священноначалнейшаго великаго света, паче яснозрителных херувим блистаяся умновидным пресвящением великаго ума, всенапросветлейшаго, в себе чин и образ нося, единому точен от серафимов, пламенноблистаемых светов, чюдноумному и всесветлому серафиму, огнем небесным разгараему и много рачителным желанием всегда палим божественыа любве, и паки в божественую любов, у престола суща великаго Бога, трисвятую ему песнь принося о всех и за вся, и от него прощаем и освящаем в духовную благодать свершенным пресвящением всесветлаго света, на освящение душам всех, привлача желанием любве, яже к нему в чюдный его свет, еже есть непостижим всякому уму. И тако от него просвящен быв всенапросветлейшим блистанием света, паче всех священноначалий церковных и прочим преподобна и сущим пoдаваше свято блаженою священноносною святынею, комуждо по мере раздал духовная дарования, овым прощение, купно же всем конечное прощение и со-верыпеное благословение, во вся на вся церковныа чины, начала же и власти. Через них же и всякия человечьския духы имущи, изливая в них изообилно свет Богоразумия ко прощению их душам, юже ти подает многоразличная премудрость Божиа к совершению святым пасти свою церковь, избранное стадо своих словесных овец, яже ти Господь сам уручи, а не человек.
Великый пастырю пастырем начальнику и всех священночиноначалии первейшему свету, церковному светилнику, всемирному солнцу, всех ходатая изрядно предложив, к ходатаю новаго завета, избрав всего тя в сий ряд и чин, по благоволению хотения Своего, во образ Свой божественый святый, и посаждей тя на престоле великаго Рима, на седалищех святых верховных своих апостол правяще слово истиное истиннаго Бога, возвещающи во всю вселенную и в концы ея спасение Божие, в свидетельство всем хотящим веровати истинному Слову Божию, подаа всем мир и здравие и все спасение благословение, силою подав ти от всемогущаго Бога на спасение всем душам, тако убо угоден есть, во всем первосвятитель, по писанию, преподобен, незлобив, бесквернен, богоугоден, всем милостив и отлучен от грешников правои житием, его же порождение, ни от плоти ни от крови, ни от похоти мужеские, но от самого Бога духом свыше породивьшея, от просвящения славы великаго света, иже просвещает всякого человека грядущаго в мир, и выше небес избран быв он самого того серафимскаго лика, и всегда предстояй у престола славы великаго Бога, и пресветлому величествию на небесех, по образу сущему, указаннаго ему на горе святей, святым служитель и сени истинней, юже сам Господь въдрузи, а не человек, им же приносити всегда жертву живу, святу и богоугодну Богу, не токмо о собе, но и о людских невежствиих и грехов, яко да будеть приношение, еже от словесных овцах приятно Богу и освящено Духом Святым истинною.
О, великий началнейший всех святых отцемь отец, тако великий толико многоблажен еси, неизреченною достойностью Бога, да кто от человек может изглаголати или изрещи праведный достоинъстви величествия святынь твоих, или ублажити по достоянию святительство изрядное твое, им же тя Господь Бог ублажил паче всех земных сынове человеческих, и сам хотех сынов света славою венчавши тя.
Мню убо тако у многа ублажен святителю божий, великый пастырю, вселеньскый учителю, законоположеный вторый Моисею, паче Арона преславный от Бога архиерею, самого того превышши чюднаго Самоила, новаго завета Христова совршенный уме, нещедрие церковное око, правителю новаго ковчега завета Христова, в нем же лежат не скрижали камены, но самое то слово Божие живо написаною и позлащено Духом Святым в сердци твоем святом вкоренено от Духа манною небесною, воспитанно всесвятейшою пречистою плотию и кровию агнеца непорочнаго Христа избавителя всего мира.
Да что еще о сем предложая время много глаголем и воистину яко ни единое слово тако возможно быти, еже от нас достойно или возможно похвалению чюдных предивных святынь твоих, которое благохваление земнороднии и ненаучении принесем ти, ублаженному, сущи от самого вышняго Бога богоносне всеблажене отче, не может бо от человек от Бога данныя ти милости, или по почести словом изрещи, аще кто и всех премудростне и разум язык имат, но токмо еже от усердия теплыя веры и палимыя любъви, юже имамы к тебе, всенасветлейшему Божии святыи мужю, поелико возможно есть, сия ти приносим малое се гранесловие, ублажающи тя, Господень великый святителю, от Бога богопраотець всем христьянскым душам, преже лет вечных прознаменовал еси, и Духа Святого свыше порождением. Папа вселенский нарековася святыя великыя вселенскыя соборныя апостольскыя церкве, съпрестолник и причастник, все-началнейший викарий, исправление вере, столп крепок от лица вражия, храбрый воин царя небеснаго, вторый Исус Наввин, и на иноплеменныя полкы побеждая и секущи нещадно глаголом Божиим - мечем духовным враги креста Христова, купно же вся видимыя и невидимыя ратники и противникы Христовы.
Авра-мов образ на себе взем, пленникы отпленил от льсти вражья, и враги со царем их поразив и гонив даже до Дафана, паче же а убие рещи, прогонив их от человеческых душь святыми твоими молитвами, даже до ада преисподняго, сего ради преболшии еси в архиереех, яко друг Божий наречеся, от многоблаженных даров свыше даровашшхх ти силою великаго Бога, веры ради твоея, яже к нему, вменися ти есть в правду в род и род до века, о всесвятый избранный Божий.
Вселеньскый пастырю великаго пастыря Христа, воистинну истинный ты еси священник Бога вышняго, приносяще ему жертву святую бескровънную о мире всего мира и благостояния святых Божиих церквах, и о совокуплении их паки во едино, дондеже достигнуть вси во единение вере и в разум в любве Сына Божия, в мужа совершена, в меру възраста исполнения Христова, не по закону Аронову, но по чину Мелхиседекову вознес честныя дары с похвалами, Богу Отцу в воню благоухания, пречистое тело и кровь Сына его возлюбленаго Господа нашего Исуса Христа за спасение всего мира, о оцыщении душь, купно же и о всех и за вся, паче же и заблужших и погибших о овцах дому Христова, яко да много милосердый Бог премногим своим человекомлюбием сим умолен быв, расточения пакы собереть и совокупит то в едино стадо, ангел и человек, в церковь перворожденых, написаном на небесех, милосердия ради милости своея богатыя, неизреченнаго ради благоутробия, юже всем имать, яко щедрый человеколюбец твоим по истине, о многоблаженный опгче, предстательством священным службе, и пречистых жертв приношение со благоприятными твоими молитвами, молбами и молением, пакы всем нам милостива того содеваи, и претворя его гнева на кротость милосердна, яко да от него обрящут вси милость в день судный, ибо Господне есть спасение на людех твоих и благословение твое отныне и до века.
Но о сем о всем твоем таковом премудром промышлении и попечении божественых овець, мы, вси сущии зде на стране далечее, словесныя овца того же стада Христова от двору его святого, святыя соборныя апостолския церкви от четырех евангелист вселеньскых святейших патриарх греческых, устава их и обычая предания научением их греческым церковным, суще порождени от купели святыя и живоначалныя Троица, обновлени банею паки бытия - свыше благодатью Святого Духа добре пасущася ими, во истинном благоверии на пажитих живоносных, на благоцветущих горах Северныя страны, яже суть ребра Северова, град самого царя великаго, понеже бо Бог в тяжестех его знаем, егда заступает от всякого насилия вражия, супостата старого змия дьявола, воздушнаго князя тме, злобы поднебеснаго, его же восхоте престол свой поставити на наших Северных странах, и быти подобен Вышнему, сего ради Бог и отпроверже и нам сию страну дарова, сам пася нас в местех сих паственех, ту нас и на водах покойнах воспита, душа наша обратил есть к себе, наставляющи нас на стезю правды заповедей своих святых имени своего ради, в нем крестихомся, приемше печать святого мира, имуще написано на челех наших благодатию Святого Духа. Сего ради аще ходим под сению сени смертныя князя сего преже реченнаго власти воздушныя, и не убоимся, яко с нами Бог есть сам, жезлом и палицею своею отгона и бия мысленыя волкы, яко да ни едина от овець его погибнет и стадо все цело и соблюденно пребудет, сею палицею и жезлом утешает душа наша и пасет, яко милосердый пастырь, щедрый и овчелюбець, милостию своею погоняя нас, и не хотящих приближитися к нему, яже не суть от двора сего, и оного его, и тыя подобно сим хощет привести, въстягавая браздами и уздою челюсти их, да будут вси едино стадо под единем пастырем Христовым.
По сем же вашей святыни всем подрученным от Христа пастырем, старейшаго пастыря, несть бо на лице зрения у Бога, якоже о сем вещает началнейши пастырь по Христе верный Петр, яко во всяком языце бояся Бога и делая правду, приятен ему есть. К сим же великий Павел, серафимский над устыи языком глаголеть: Вся, иже аще призовет имя Господне, спасется, тя бо есть Бог богатя в всех, якоже кому хощет разделяет меру дарования веры по своей ему воли, воли бо его кто противится, сего ради затвори вся во противление, да помилует. Понеже бо единое славы Христа все тело христьянскых душь составление истинно крещением Святого Духа, о нем же всяко создание составляя растет в церковь святую о Господи, о нем же и мы созидахомся купно все в дом Господень в долготу дни века. Несть бо разньствиа о Христе греком и римляном, и нам сущим росийским словяном, вси едино тоже суть, в нем же зван бысть, в том да пребывает, кождо в своем чину. Всем же нам тако Христос, потом же Христовии, елицы во Христа крещени, во Христа облекошася, ни едини бо послушницы закона оправдаются, яко же не естеством законная творяще, имуще закон написано во сердцих своих.
Сего ради сия написахом к вашей всей насвятейшой святости, слышахом некыи от нас пред вашею святынею исповедающи глаголы ложныя, хулящая нас, и глаголюще, яко несмы совръшени истиннии христьяне святыя православныя веры Христовы, и иная таковая многа на нас хвалящая, блядением дышюще, завистию опаляеми, в коле жертва своего языка клевещюще пражным от огня геоньскаго ради лепотен неправде, исполнь суще яда смертоносна, им же обыкоша Бога Отца благословити, сим же паки клевещуще верныя человекы, благоверно живущим созданным Духом Святым по образу Божию и по подобию, и званных же преже лет вечных в благодать сию, и по позрению великаго Бога, сгда еще мир не бысть, яко да внидут во веру сию святую, надеждю и любовь в себе имуще к Господу, чающе оного блаженнаго упования и просвященил, славы великаго Бога Господа нашего Исуса Христа.
Сим же, елика убо неведят, хулят елика же по естеству, яко бесловеснах живота видят, разумеюще себе душевно, а не духовно, сами прелщающеся глаголють, клевещуще на ны, воистину сии суть облаци безводни, от ветр приносимы, древеса бесплодна есенна, волны сверепыя моря, воспеняюща своя струя, звезды прелестныя, им же мрак тмы в векы блюдется, о них же пророчьствова седмый Иоан Дамаскин. Енох сия глаголя, якоже свидетельствует о сем Июда Ияковль в соборном своем послании пиша о сих пространнеи: Таковии не хотят, да быхом были вси едино тело о Христе, не слышат самого, заповедающа и глаголюща: Сия заповеди вам, да любите друг друга, якоже и аз вы възлюбих вы, о сем познают вси, яко мои ученицы есте, аще любовь имети будете между собою. А идеже несть любви, тамо Бог не пребывает. Такова премудрость несть свыше нисходит, но земна душевна бесовьскаа, идеже бо зависть и распре, ту нестроение и всяка злая вещь.
И мы же веруем на святейшей вашей всей многоразумной, в благоразсужении великой глубиной премудрости, яко не имите веры сим, и тако к тому подобным иным прочим вещем, еже на нас клевещут, не по истинне хотящи раздражати твое незлобие благомилосердие еже к нам, но паки премудрость, пастырь и вселенней учителный отець, место продаси своему всесветлому уму, в рассуждение святых истинных писаний, идеже обрящет незазорна правда к нам, ко всем требующим благословения твоего святого, последующи своего прьвоначальнейшаго пастыря, яко грядущих к нему не изгоняет вон, но всех равнокупно милостиве к себе приемлет от востока, запада, севера, моря, яко да о нем въблагословятся вся колена земная, и вси языцы ублажат его.
РФА вып. 5. сс. 1071-1074
← Ctrl ← Alt
Ctrl → Alt →
← Ctrl ← Alt
Ctrl → Alt →